Balıqlarınızın düzgün baxımı üçün bilməli olduğunuz hər şey

Bu məqalədə yeni akvariumun qurulması, balıqların uyğunlaşması və suyun düzgün dəyişdirilməsi ilə bağlı əsas məqamlar izah olunur.

1. Yeni akvariumun qurulması

Yeni akvarium qurmaq düzgün planlama tələb edir. İlk olaraq akvarium üçün günəş şüası düşməyən, möhkəm və düz yer seçilməlidir. Yeni başlayanlar üçün orta ölçülü akvariumlar daha uyğundur.
Sıfırdan qurulum üçün əsas avadanlıqlar filter, qızdırıcı, termometr və işıqlandırmadır. Filter suyun təmizliyini və bioloji tarazlığı təmin edir, qızdırıcı isə temperaturu stabil saxlayır.
Akvariumun altına əvvəlcədən yuyulmuş xüsusi qrunt əlavə olunur. Dekorasiyalar balıqlar üçün gizlənmə yerləri yaradır və kəskin olmamalıdır. Su doldurularkən xloru aradan qaldırmaq üçün 3–4 gün əvvəldən açıq qabda su dinləndirilib, daha sonra su kondisionerindən istifadə edilməlidir. Balıqlar dərhal buraxılmamalıdır. Akvarium filter işlək vəziyyətdə 7–14 gün boş saxlanmalı, bu müddətdə bioloji balans formalaşmalıdır. Daha sonra balıqlar tədricən və az sayda akvariuma əlavə edilir.

2. Yeni balıqların uyğunlaşması

Yeni alınan balıqlar üçün akvariuma uyğunlaşma prosesi çox vacibdir. Birdən-birə fərqli su temperaturu və şərait balıqlarda stress yarada, hətta ölümə səbəb ola bilər. Balıqlar akvariuma buraxılmamışdan əvvəl torba halında 15–20 dəqiqə akvarium suyunda saxlanmalıdır ki, temperatur bərabərləşsin. Daha sonra torbaya az-az akvarium suyu əlavə edilir. Təxminən hər 5 dəqiqədən bir kiçik miqdarda su qatılaraq balıqlar suyun tərkibinə tədricən öyrəşdirilir. Bu proses 20–30 dəqiqə davam etməli, suyun həcmi ikiqat artdıqdan sonra balıqlar torbadakı su ilə birlikdə deyil, tor vasitəsilə akvariuma buraxılmalıdır. Uyğunlaşma zamanı işıq zəif olmalı, balıqlar dərhal yemlənməməlidir. İlk saatlarda balıqlar müşahidə edilməli, davranışlarında anormallıq olub-olmadığına diqqət yetirilməlidir. Düzgün uyğunlaşma balıqların stressini azaldır və akvariuma sağlam şəkildə alışmalarını təmin edir.

3. Akvarium suyunun dəyişdirilməsi

Akvarium suyunun mütəmadi dəyişdirilməsi suyun təmiz və sağlam qalması üçün vacibdir. Su tamamilə dəyişdirilməməli, yalnız bir hissəsi yenilənməlidir, çünki faydalı bakteriyalar su balansının qorunmasında mühüm rol oynayır. Adətən həftədə bir dəfə akvarium suyunun 20–30 faizi dəyişdirilir. Yeni əlavə olunan su əvvəlcədən hazırlanmalı, temperaturu akvarium suyuna yaxın olmalı və xloru aradan qaldırmaq üçün su kondisionerindən istifadə edilməlidir. Su dəyişimi zamanı torpaq yüngül şəkildə təmizlənməli, lakin filter materialları kran suyu ilə yuyulmamalıdır. Kran suyundakı xlor faydalı bakteriyaları məhv etdiyi üçün bioloji balans pozula bilər. Filter süngəri və digər materiallar yalnız akvariumdan çıxarılan köhnə su ilə yüngül şəkildə sıxılaraq təmizlənməlidir.

4. Balıqların yemləməsi

Akvarium balıqlarının sağlamlığı düzgün qidalanmadan keçir. Həddindən artıq yemləmə ən çox yayılmış səhvdir və su keyfiyyətini ciddi şəkildə pozur. Bu məqalədə akvarium balıqlarının düzgün qidalanması haqqında ətraflı məlumat verəcəyik.

Nəticə: Akvarium balıqlarınız üçün keyfiyyətli yemlər və avadanlıqlar üçün Zoo28.az onlayn mağazasını ziyarət edin.